«Իմացումի հրճվանք» ծրագրի առաջին տարի
- 5տարեկանների ուսումնական պլան
- 5-տարեկանների ուսումնառության պայմանագիր
- 5 տարեկանների ուսուցման և զարգացման ծրագիր․ «Իմացումի հրճվանք» ծրագրի առաջին տարի
«Մխիթար Սեբաստացի» կրթահամալիրը, որպես «Ստեղծողի մոբիլ դպրոց» հեղինակային (պետական այլընտրանքային) կրթական ծրագրի ստեղծող ու իրագործող, իրականացնում է հինգ տարեկանների ուսուցման և զարգացման ծրագիր, որն իրենից ներկայացնում է ինտեգրացված, այլընտրանքային խաղ-ուսուցում։
Ծրագրի նկարագիր
Հինգ տարեկանների ուսուցման և զարգացման խմբերի գործունեությունը կազմակերպվում է համաձայն Հայաստանի Հանրապետության oրենսդրության, Նախադպրոցական կրթության պետական չափորոշչով, կրթահամալիրի ներքին կարգապահական կանոններով, դպրոց-պարտեզի կանոնադրությամբ, ուսումնական օրացույցով, կրթահամալիրի զարգացման ծրագրով:
Հինգ տարեկանների ուսուցման և զարգացման խմբերը իրականացնում են նախադպրոցականի (այսուհետև՝ սան) խնամք, զարգացում, ուսուցում նրա տարիքային առանձնահատկություններին համապատասխան պայմաններում, միջավայրում, համապատասխան բովանդակությամբ և գործունեություններով՝ ապահովելով սանի զարգացումը՝ նրա անհատական զարգացման առանձնահատկություններին համապատասխան։
Ծրագրի հիմնական նպատակը ստեղծող, անընդհատ կրթվող և ինքնակրթվող, ինքնուրույն, սոցիալապես ակտիվ անհատի ձևավորումն է: Այն ապահովում է սովորողի անհատական կրթության իրավունքը, կրթության շարոնակականությունն ու անընդհատությունը, սովորողի ինքնուրույնության, ինքնաբուխ, անվտանգ գործունեության, հիգիենիկ հմտությունների, ստեղծականության զարգացումը:
Հինգ տարեկանների ուսուցման և զարգացման խմբերը գործում են դպրոց-պարտեզների (այսուհետ՝ դպրոց) կազմում՝
Արևելյան դպրոց- պարտեզ
Արևմտյան դպրոց- պարտեզ
Հյուսիսային դպրոց- պարտեզ
Հարավային դպրոց- պարտեզ
Քոլեջի նախակրթարան
Ուսումնական գործունեության կազմակերպումը
Ծրագիրն իրականացվում է ուսումնական և հասարակական նախագծերի, ստուգատեսների ծեսերի, ուսումնական ճամփորդությունների, կրթահամալիրի ուսումնական օրացույցի, նախադպրոցական լաբորատորիայի օրացույցի հիման վրա:
Հինգ տարեկանների ուսուցման և զարգացման գործունեությունը կազմակերպվում է խմբի (դասարանի) ուսումնական օրացույցով, որը դպրոց-պարտեզի օրացույցի հավելվածն է, կրթահամալիրի, նախադպրոցական լաբորատորիայի, խմբային, ընտանեկան, անհատական ուսումնական նախագծերով։
Սահմանված կարգով իրականացվող ուսումնական ճամփորդությունները ուսուցման և զարգացման բաղկացուցիչն են:
Հինգ տարեկանների ուսուցման և զարգացման ծրագիրը կազմված է երկու փուլից։
Երկրորդ փուլում ծրագիրն ապահովում է պետական կրթական չափորոշչի՝ կրտսեր դպրոցի առաջին դասարանին ներկայացվող պահանջները, սովորողի անհատական կրթության իրավունքը, կրթության անընդհատությունը։
Ուսուցումը, խնամքն ու զարգացումը կազմակերպվում են անվտանգ, հիգենիկ և լուսավոր միջավայրում՝ սովորողի մտավոր և ֆիզիկական զարգացման համար անհրաժեշտ պայմանների և միջոցների կիրառմամբ:
Ուսումնական գործունեությունը կազմակերպվում է կրթահամալիրի ուսումնական, դասարանական օրացույցներով, որոնցով որոշվում են ուսումնական նախագծերը, ստուգատեսները, ծեսերը, տոները: Դասվարի բլոգը, մեդիագրադարանը, «Պարտեզ», «Բզեզ» ուսումնական կայքերն ապահովում են անհրաժեշտ ուսումնական նյութերով, միջոցներով: Դասվարի բլոգը, դպրոց-պարտեզների ենթակայքը, կրթահամալիրի կայքը հասանելի են դարձնում սանի ուսումնական գործունեության արդյունքները՝ մեդիանյութերը, հաշվետվությունները:
Ուսուցման գործընթացը հիմնականում առկա է, սահմանված կարգով իրականացվում է նաև անցում հեռավար, առցանց-ընտանեկան ձևերին։
Մեդիան իր գործիքներով (նոթբուք-նեթբուք, պլանշետ, համացանց և այլն) և հնարավորություններով ապահովում է սովորողի համակողմանի զարգացումը՝ կատարելագործելով և հարստացնելով ձեռք բերած հմտություններն ու գիտելիքները:
Կրթական ծրագիրն ապահովում է սովորողի ամբողջական ներառումը: Սանի ուսուցում-զարգացումը կազմակերպվում է նաև տանը՝ ընտանեկան նախագծերի միջոցով՝ ծնողների մասնակցությամբ: Ընտանեկան դպրոցները մասնակցում են ամենամսյա ֆլեշմոբներին, ուսումնական նախագծերին:
ՏՀՏ հմտությունները ձեռք են բերվում ուսուցման և զարգացման ընթացքում: Սաները թե՛ տանը, թե՛ դպրոցում ունեն համակարգիչ (նեթբուք-նոթբուք), ուսումնական գործունեության ընթացքում յուրացնում են Paint նկարչական խմբագրի, MS Word տեքստային խմբագրի հիմնական գործիքները: Կիրառում են թվային ձայնագրիչ, ֆոտոխցիկ, հեռախոս: Դասարանական ռադիո և TV նախագծերը սովորողների խոսքի զարգացումն ապահովող, ինքնարտահայտվելու ցանկությունը խթանող ձևերից են:
Ուսումնական գործունեության միջավայրը
Ուսուցումը կազմակերպվում է անվտանգ, հիգենիկ և լուսավոր միջավայրում՝ սովորողի մտավոր և ֆիզիկական զարգացման համար անհրաժեշտ պայմանների և միջոցների կիրառմամբ:
Կրթահամալիրի բոլոր շենքերը լուսավոր ու ընդարձակ ուսումնական տարածքներ են, հարմար՝ խաղալու, վազելու, հեծանիվ և ինքնագլոր վարելու, հանգստանալու, ուսումնասիրելու, հետազոտելու, ստեղծելու-ստեղծագործելու, նկարելու-լուսանկարելու, չափելու, համեմատելու, իրագործելու, փորձելու, իրականացնելու համար։ Բակ-պարտեզները կանաչապատ են, պտղատու ծառերով, խնամված խոտածածկ տարածքներով և ամենակարևորը՝ անցանկապատ։
Կրտսեր դպրոց-պարտեզների ազատ ու անվտանգ միջավայրը, միջավայրային փոփոխությունները, բարելավումը, զարգացումը, կրթական ծրագիրը ապահովում են սովորողի անհատական կրթության իրավունքը, կրթության շարունակականությունն ու անընդհատությունը, սովորողի ինքնուրույնության, ինքնաբուխ գործունեության, հիգիենիկ հմտությունների, ստեղծականության զարգացումը:
Ուսումնական գործունեության միջավայրեր են՝
- խմբասենյակ-լաբորատորիաները
- խաղողի-գինու դպրոցը
- քանդակի դպրոցը
- ջերմոց-լաբորատորիան
- մարզական տարածքները
- խոհանոցը
- տեխնոլոգիական սրահները
- ուսումնական Ագարակը
- բակ-պարտեզները
- բաց ու փակ լողավազանները
- ընտանեկան դպրոցները։
Հինգ տարեկանների ուսուցումը և զարգացումը հաճախ կազմակերպվում են նաև բացօթյա, հիգիենիկ միջավայրում, տաղավարային այլընտրանքային լուծումներով ուսումնական տարածքներում, որոնք ապահովում են անցումները գործունեության մի ձևից մյուսին, փոխակերպվող են, շարժական։
Խմբասենյակ-լաբորատորիաները աշխատանքային տարածքներ են՝ իրենց բաղկացուցիչ մասերով՝
- սեղան-աթոռներ
- սանհանգույց, լվացարան
- հանդերձարան
- մարզական տարածք
- խոհանոց
- ընթերցարան
- խաղանկյուն
- ջերմոց
- երաժշտական անկյուն
- դիտասրահ
- շախմատի անկյուն
- տեխնոլոգիայի անկյուն։
Սննդի կազմակերպումը
5 տարեկանների սնունդը պատրաստվում է դպրոց-պարտեզների խոհանոցներում՝ սահմանված կարգով, պատրաստված սնունդը տեղափոխվում է խմբասենյակ՝ խոհանոց-լաբորատորիայում։ Սննդի կազմակերպումը խմբասենյակի խոհանոցային-լաբորատորիայում՝
- նախաճաշ
- ճաշ
- ետճաշիկ։
Կրթահամալիրում ճաշացանկը միասնական է։ Ճաշացանկը կազմվում, գրվում է առողջագետի կողմից և նախապես հրապարակվում դպրոցի ենթակայքում, դասվարի բլոգում։ Առողջագետի կազմած ճաշացանկը հաստատում է աշխատանքային խումբը և հետևում։
Գնահատումը՝
Ուսումնական տարին կազմված է երկու մեծ փուլից՝ բաղկացած երկուական շրջափուլերից։ Երկրորդ և չորրորդ շրջափուլերը կազմակերպվում են որպես ուսումնական-ստուգատեսային ճամբարներ։
Սովորողների ուսումնական գործունեության արդյունքները ներկայացվում են ամենշաբաթյա կամ ամենամսյա ստուգատեսների՝ Ամսիկների տեսքով, ինչպես նաև ցուցահանդեսներում, ներկայացումներում:
Ամենամսյա «Ամսիկներ» կամ ամենշաբաթյա ստուգատեսների կազմակերպման նպատակը «Իմացումի հրճվանք» ծրագրի կրտսերների գործունեության արդյունքների ներկայացումն է:
Ամսիկները կազմակերպվում են յուրաքանչյուր ամսվա հինգշաբթի օրերին: Յուրաքանչյուր հինգշաբթի 5-6 տարեկանների ուսուցման մեկամյա խմբերը ներկայանում են որևէ գործունեության ոլորտի ամփոփում-ստուգատեսով: Ստուգատեսային գործունեության արդյունքները գրանցվում են մշակված դիտարկման թերթիկներում: Ամենամսյա Ամսիկները կազմվում են յուրաքանչյուր ամսվա վերջին հինգշաբթի օրերին։
Յուրաքանչյուր սովորողի համար, սահմանված կարգով լրացվում է զարգացման բնութագիր, որում ներկայացվում են սովորողի արժեքային համակարգը, նրա կողմից յուրացված գիտելիքների, կարողությունների, հմտությունների որակական բնութագիրը: Սովորողի ծնողը սահմանված կարգով մասնակցում է իր երեխայի բնութագրի, բլոգի վարման աշխատանքներին։
Հինգ տարեկանների ուսուցման և զարգացման ծրագիրը ղեկավարում է դասվարը։ Կրթական ծրագրի ղեկավարը, նրա օգնականը մասնակցում են սեմինարների, վերապատրաստումների: Նրանք ունեն անհատական բլոգներ, որտեղ ամփոփվում են ուսումնական գործունեության արդյունքները։ Խմբերի ուսումնական գործունեությունը կազմակերպվում է շաբաթական աշխատակարգերի միջոցով:
Հինգ տարեկանների զարգացման ծրագրի ղեկավարը (դասվարը), ուսուցման երկրորդ փուլից սկսած, առաջնորդվում է 1-3-րդ դասարանների դասվարին ներկայացվող պահանջներով։
Կրթական ծրագրի վերջնարդյունքներ, դրանց գրանցումը
Հինգ տարեկանների ուսուցման և զարգացման ծրագրի՝ մեկամյա ուսուցման վերջնարդյունքներն են՝
- Ինքնասպասարկման, անվտանգության, առողջ ապրելակերպի ոլորտներին վերաբերող վերջնարդյունքներ։
- Խոսքի և հաղորդակցության ոլորտի զարգացման ու կրթության վերջնարդյունքներ։
- Բանավոր ուրախ օտար լեզուների ուսուցման վերջնարդյունքներ։
- Իմացական ոլորտի զարգացման ու կրթության վերջնարդյունքներ։
- Շարժողական ոլորտի զարգացման ու կրթության վերջնարդյունքներ։
Հինգ տարեկանների զարգացման ծրագրի առաջին տարվա ուսուցման բաղադրիչներն են՝
- մայրենի խոսք
- թվաբանություն
- կերպարվեստ և տեխնոլոգիա
- երգ-պար
- մարմնակրթություն
- մեդիատեխնոլոգիաներ
- ռուսերեն, անգլերեն
- բնագիտություն
- ուսումնական ներքին և արտաքին տարածքների ամենօրյա խնամք:
Ուսումնական ռեսուրսներ
- Խաղիկներ, ասիկներ, հաշվերգեր
- Համակարգչային, առցանց խաղեր
- Ծիսական, երաժշտական խաղեր
- Մարզական, բակային, ազգային խաղեր
- Ջրային խաղադարան
- Տրամաբանական, սեղանի խաղեր
- Ռոդարիական խաղեր
Փաստաթղթեր
Ուսումնական պլաններով որոշած կարգեր
Ընդունելությունը
Հինգ տարեկանների խմբում ընդունվել ցանկացողների ծնողները ծանոթանում են իրականացվող հեղինակային ծրագրին, կնքում են սահմանված պայմանագիրը դպրոց-պարտեզի ղեկավարի հետ: Ճամբարից հետո սովորողի ծնողի (օրինական ներկայացուցիչ) հետ կնքվում է մեկամյա ուսումնառության պայմանագիր։
Հինգ տարեկանների զարգացման մեկամյա ուսուցման ծրագրի արդյունքներով սանը տեղափոխվում է «Իմացումի հրճվանք» ծրագրի երկրորդ տարի։ Ծրագիրը քառամյա է: Ծրագրված քառամյա ուսումնական գործունեության արդյունքում սովորողը ՀՀ ԿԳՄՍՆ սահմանած կարգով մասնակցում է 4-րդ դասարանի ավարտական ստուգումներին և տեղափոխվում 5-րդ դասարան։ Մինչև այդ ստուգումն անցնելը, ծրագրի ցանկացած փուլում, այլ ուսումնական հաստատություն տեղափոխվելիս սովորողին տրվում է իր տարիքային խմբի դասարանում սովորողի տեղեկանք: